Салауат Юлаев көндәре быйыл онлайн форматта үтә

2020 йылда Башҡортостандың милли геройы Салауат Юлаевтың тыуыуна 266 йыл. Пандемия сәбәпле, байрам быйыл онлайн форматта үтәсәк.

12 — 16 июндә саралар бөтә республикала һәм интернет-майҙансыҡтарҙа ойошторола.

БР Милли музейында видеоконференция үтәсәк. Ул Салауат Юлаев шәхесенә арнала.

Башҡорт дәүләт опера һәм балет театры Заһир Исмәһилевтың «Салауат Юлаев» операһын, БР Милли симфоник оркестры операға увертюраһын үҙ ютуб-каналында күрһәтәсәк.

М.Кәрим исемендәге милли йәштәр театры архивтағы М.Кәримдең «Салауат. Өн аралаш төш» спектаклен, Нефтекама филармонияһы «Оран» шиғри программаһын әҙерләй.

"Башҡортостан» киностудияһы төшөргән документаль фильмдар республика телеканалдары эфирына ҡуйыла. Ф.Ғәскәров исемендәге академия бейеү ансамбле лә тамашасыларға айырым программа күрһәтәсәк.

Бөтә донъя башҡорттары ҡоролтайы Инстаграмында шиғырҙар бәйгеһе ойошторола.

Күргәҙмә, концерт программалары, ижади конкурстар - барһы ла Салауат Юлаевҡа бағышлана.