Балалар баҡсаларында башҡорт теле нисек өйрәтелә?

Бөтә донъя башҡорттары ҡоролтайы, уның мәғариф, фән, башҡорт телен һәм әҙәбиәтен һаҡлау буйынса комиссияһы «Башҡорт телен һаҡлау һәм үҫтереү буйынса төп мәсьәләләр» темаһына Методик совет ултырышын үткәрҙе.
Сарала Бөтә донъя башҡорттары ҡоролтайы Президиумы рәйесе, Дәүләт Думаһы депутаты Эльвира Айытҡолова, Башҡортостан Башлығының ижтимағи-сәйәси үҫеш буйынса идаралығы етәксеһе кәңәшсеһе Рөстәм Баянов, Өфө ҡалаһы хакимиәте башлығы урынбаҫары Гөлләриә Ялсыҡаева, Бөтә донъя башҡорттары ҡоролтайы Башҡарма комитеты, Аҡһаҡалдар ҡоро ағзалары, баш ҡала райондарының башҡорт ҡоролтайҙары, мәғариф идаралыҡтары вәкилдәре, туған телдәр буйынса методистар, мәғариф учреждениелары етәкселәре, башҡорт теле һәм әҙәбиәте уҡытыусылары, тәрбиәселәр, ата-әсәләр комитеттары ағзалары ҡатнашты.

Сараны Эльвира Ринат ҡыҙы Айытҡолова алып барҙы. Көн тәртибе буйынса, «Башҡортостан Башлығының ҡушыуына ярашлы, республиканың балалар баҡсаларында башҡорт телен өйрәнеү һәм милли мөхит булдырыу» темаһына Бөтә донъя башҡорттары ҡоролтайының мәғариф, фән, башҡорт телен һәм әҙәбиәтен һаҡлау буйынса комиссияһы рәйесе Лариса Абдуллина сығыш яһаны. Икенсе һорау буйынса, «Башҡортостандың мәктәпкәсә белем биреү учреждениеларында башҡорт телен уҡытыуға һәм өйрәнеүгә мониторинг» темаһына республиканың Мәғариф һәм фән министрлығындағы милли белем биреү бүлеге етәксеһе Розалия Сафиуллина киң мәғлүмәт бирҙе.

Өсөнсө һорау «Мәктәпкәсә белем биреү ойошмаларында башҡорт телен уҡытыу һәм өйрәнеү» темаһына бағышланды, уның буйынса Өфө ҡалаһы хакимиәтенең мәғариф идаралығы етәксеһе урынбаҫары Ирина Басенко сығыш яһаны.
Артабан һәр темаға бәйле киң фекер алышыу үтте, ултырыштың ҡарары ҡабул ителде.