Изгелек өләшеп йәшәй

Ауылдарҙа төрлө яҙмышлы, һәр ҡайһыһы үҙенсә һәләтле кешеләр менән күп осрашырға тура килә. Улар менән һөйләшеү күңелде тағы ла байытып ебәрә. Күптән түгел ошондай замандаштарыбыҙҙың береһе – Бишбүләк районының Ҡаныҡай ауылынан Светлана Хәйруллина менән таныштыҡ.

Яҙмыш ҡуйған һынауҙарға бирешмәгән, көслө рухлы апай, тормоштан йәм табып, үҙе матурлыҡ булдырып, башҡаларға изгелек өләшеп йәшәй. Ҡаныҡай килене ул. Ошо ауылды үҙ итеп, тормош иптәше Фәһим ағай менән матур балалар үҫтереп, донъя көтәләр.

Ауылда уны ҡул эшенә оҫта булараҡ та беләләр. Ә был ҡыҙыҡһыныу иһә бала сағынан әсәһенән килә.

– Әсәйем ҡул эшенә оҫта ине. Балаҫ та һуҡты, кейем дә текте. Уның балаҫ һуғыу станогы янына ултырып, эшен боҙоп та бөтә торғайным, ләкин ул мине бер ҡасан да әрләмәне. Киреһенсә, үҙенең белгәнен өйрәтергә тырышты. Әле лә хәтеремдә, өй уртаһына теген машинаһын ҡуйҙы ла минән мендәр тышы тектерҙе. Мәктәптә бәйләмгә өйрәттеләр. Шапкаларҙы биҙәк менән бәйләгәнем әле лә күҙ алдында.

Атайым да матурыҡты күрә белде. Аллаға шөкөр, ул әле лә иҫән. Йәштән ағас эшенә оҫта булды. Тояҡтарын йышып-һырлап эшләгән өҫтәл, ултырғыстар әле лә бирешмәгән. Тәҙрәнең йөҙлөктәрен дә матур итеп биҙәп эшләй торғайны. Һүрәт төшөрөргә яратыуым да ата-әсәйемдән киләлер, – тип ихлас һөйләп алып китте бала саҡ йылдары тураһында әңгәмәсем.

Олоғайып, ваҡыт иркенәйгәс, мөмкинлек тағы ла күбәйә. Бынан бер нисә йыл элек һаҡал эшләп ҡарай һәм ул уңышлы килеп сыға. Үҙенең эшендә Дим буйы башҡорттарының биҙәктәрен яһай. Был эште ауылдың фольклор коллективына йөрөгән гүзәл заттар бергәләп башҡара. Светлана һуңынан ҡашмауға ла тотона. Артабан төрлө ҙурлыҡтағы стилләштерелгән һаҡалдарға күсә, таныштары араһында эштәрен оҡшатып, заказ биреүселәр ҙә бар.

Һуңынан иһә алҡалар эшләүгә ҡыҙыҡһыныуы барлыҡҡа килә. Улар ҙа зауыҡлы, матур килеп сыға.

Светлана апайҙың ҡулы һис ҡасан эшһеҙ тормай. Элегерәк ҡурсаҡтар ҙа тегә, шәл дә бәйләй, сигеү ҙә сигә.

– Ҡул эштәренә бөтә күңелемде һалып тотонам. Эшем матур килеп сыҡһа, шуға ҡарап һөйөнәм. Күңел күтәрелеп, донъя матурланып киткән һымаҡ була. Эшемде тамамлайым тип алданып, бөтә донъямды онотоп эшләйем.

Минең фекеремсә, ҡатын-ҡыҙға биҙәүестәр кәрәк. Ул уны тағы ла күркәмерәк итә, күҙ тейеүҙән дә һаҡлай, – ти ҡул эше оҫтаһы.

Ҡыйынлыҡҡа зарланып ултыра торғандарҙан түгел, Светлана Мәхмүт ҡыҙы. Тирә-йүндәгеләргә изгелек өләшеп донъяны йәмләп йәшәй. Махсус хәрби операциялағы һалдаттарға ярҙам булһын, еңеү тиҙерәк килһен, тигән маҡсатта ауылдаштары менән бергә клубҡа маскировка селтәре, костюмдар үрергә йөрөй, дронға ҡаршы япмалар эшләйҙәр. Уртаҡ уй-теләк ауылдаштарҙы берләштерә, туплай.

Автор фотоһы.