Мәсетле районында айыҡлыҡ байрамы үтте. Унда «Айыҡ ауыл-2024» республика конкурсының муниципаль этабында әүҙем ҡатнашыусы ауылдар үҙҙәренең ҡул эштәренән торған күргәҙмәләр алып килде һәм оҫталыҡ дәрестәре үткәрҙе.
Мәртәбәле сараны Һөләймән ауылынан «Йәшлек» фольклор ансамбле «Косилка–молотилка» бейеүе, Оло Аҡа ауылы - «Әхирәтләр» фольклор коллективы «Ҡунаҡ ҡаршылау» йолаһы, Тайыш ауылынан «Аҡсарлаҡ бейеү коллективы «Торналар» бейеүе, Дыуан-Мәсетле ауылынан «Зөбәржәт» фольклор төркөмө «Байрам» ҡумыҙсылар ансамбле - «Бейеү көйҙәренән теҙмә» (попурри ) һәм «Ауылым ынйылары» фольклор коллективы «Күңел йылыһы» бейеүе менән биҙәп ебәрҙе.
Бәйге көсөргәнешле барҙы. Һәр ауылда эскелеккә ҡаршы төрлө профилактик саралар үткәрелде. Конкурста ҡатнашыусы ауылдар араһында айыҡ йәшәү рәүешен пропагандалау буйынса эш алып барылды, рейдтар, алкоголгә, тәмәкегә, наркотиктарға бәйле ауырыуҙарға бирешкәндәргә ярҙам күрһәтеү һәм башҡа саралар ойошторолдо. Конкурс сиктәрендә «Уңыш байрамы», «Алтын туй», «Ололаһаң олоно, ололарҙар үҙеңде», «Сәләмәт ауыл - сәләмәт республика» спорт байрамы, скандинав атлау марафоны, кәбеҫтә байрамы, һуғым өмәләре, бауырһаҡ бешереү буйынса оҫталыҡ дәрестәре һәм башҡа байрам саралары үтте.
Ойоштороу комитеты ағзалары уларҙың эштәрен даими баһалап торҙо. Комитет составында Мәсетле районы хакимиәте башлығының социаль мәсьәләләр буйынса урынбаҫары Илнур Вәлиев, Мәсетле районы хакимиәтенең эштәр идарасыһы Анфиса Ишмөхәмәтова, Мәсетле районы башҡорттары ҡоролтайы Башҡарма комитеты рәйесе Зәлифә Ғәлиуллина, Ҡошсо ырыуыныңь ҡор башы, аҡһаҡал Әхмәтнур Хафизов һәм муниципаль район хакимиәтенең мәғлүмәт-аналитика бүлеге начальнигы Айгөл Шәрәпова - еңеүселәрҙе билдәләне.
«Айыҡ ауыл-2024» республика конкурсының муниципаль этабының еңеүсеһе тип Ясин ауылы танылды. Хәҙер улар республика конкурсында район исеменән сығыш яһаясаҡ.
«Иң яҡшы айыҡлыҡ ойошмаһы» номинацияһында Оло Аҡа ауылы, «Айыҡлыҡта изгелек» номинацияһында Абдулла, «Иң сәләмәт ауыл» номинацияһында Яңы Яуыш, «Спорт ауылы» номинацияһында Айып, «Айыҡ киләсәк» номинацияһында Дыуан-Мәсетле, «Сәләмәт ғаилә - илдең киләсәге» номинацияһында Һөләймән ауылндары еңеүсе тип табылды.
Мәсетле районы хакимиәте башлығы Әнис Әсәҙуллин бәйгелә ҡатнашҡан ауылдарға рәхмәтен белдерҙе һәм киләсәктә лә айыҡ тормош яҡлы булыуҙарын теләне.
Мәсетле районы башҡорттары ҡоролтайы Башҡарма комитеты рәйесе Зәлифә Ғәлиуллина иң әүҙемдәргә рәхмәт хаттары тапшырып, «Айыҡ ауыл-2024» республика конкурсының муниципаль этабында ҡатнашыусыларға изге теләктәрен еткерҙе.
