Самауырҙар фестивале — инвестһабантуйҙың биҙәге

Сибай ҡалаһында «Урал аръяғы-2024» VI Бөтә Рәсәй инвестиция һабантуйында быйыл Самауырҙар фестивале ойошторолған. Республиканың төрлө район һәм ҡалаларынан самауыр күргәҙмәһенә шәхси коллекционерҙарҙан алып ауыл халҡынан берәмләп йыйылған тиерлек самауырҙар килеп түрҙән урын алған!

Бала саҡтың иң матур хәтирәһе булып урындыҡ түренә менеп ҡунаҡлаған, һәр саҡ боҫрап ҡайнап ултырған өләсәйемдең самауыры янында күрше инәйҙәрҙең бергә йыйылышып, көңгөрләшеп сәй эсеүе һаҡлана. Шуға күрә ҡайҙа ғына барһам да, самауырлы табын булһынмы, самауырҙар күргәҙмәһеме, Самауыр байрамы үтһенме һәр ерҙән ана шул бала саҡтың бер йылыһын эҙләп, күңелемә нур алып ҡайтырға тырышам. Был юлы ла һәр самауыр янына барып, уларҙың хужалары менән танышып сыҡтым тигәндә лә була.

Баймаҡ ҡалаһынан Мансур Сәйетҡоловтың коллекцияһы ла үҙе ни генә тора! Ниндәй генә самауырҙары юҡ уларҙың?!

Халҡыбыҙҙың онотола барған боронғо шөғөлөн үҙ иткән ағай Баймаҡ ҡалаһында йәшәй. Тәүҙәрәк бары тик ҡыҙыҡһыныуҙан ғына башланған эше бөгөн уның күңел талабын ҡәнәғәтләндергән, буш ваҡытын үткәрергә ярҙам иткән кәсепкә әйләнгән, тиһәк тә була. Иртәнән алып кискә тиклем үҙенең аласығында самауыр йүнәтә ул. Үҙенә күрә кескәй оҫтахананы хәтерләткән эш урынында ниндәй генә тимер-томор юҡ: станогы ла, кәрәкле ҡорамалдары ла урын алған, тимер мейестә ут яна, түрҙә самауырҙар ултыра. Улар араһында яртылаш ҡыйшайып, һемәгенән һыу ағып ултырғандары ла, утлыҡтары эшкинмәй, ҡайнатырға яраҡлы булмағандарын да осратырға мөмкин. Шулай уҡ кемдер йүнәтергә алып килгән, икенселәре йылдар буйына йыйылған юшҡынды таҙартыуын һораған. Барыһы ла оҫтаның ҡулы тейеү менән ҡайтанан «терелеп» китә, ҡуҙ һалыу менән йырларға тотона.Тәү ҡарашҡа ғына еңел күренгән шөғөл, ысынында иғтибарлы булыуҙы талап итә, хатта ҡайһы урынында ювелир ҡулының булыуы ла мотлаҡ.

Саҡмағош районынан Макбул Ғилемхановтың да шәхси самауырҙар күргәҙмәһе иҫ китерлек! Иң боронғо самауыр 1823 йылғы. Коллекционер үҙе ауырып китеү сәбәпле килә алмаған, әммә уның самауырҙарын Иҫке Ихсан ауылынан Гүзәл Хәйруллина алып килгән.

Бөрйән районының Яңы Усман ауылы һәм Баймаҡ районының Үрге һәм Түбәнге Иҙрис ауылынан килеүселәр самауырҙар күргәҙмәһе генә ойоштормаған, ә самауырға, сәйгә бәйле таҡмаҡтар ҙа сығарған. Көйәргәҙе районының Яңы Мораптал ауылы делегацияһының да самауырҙарының күплеге һәм Абдрахман Сөләймәнов үҙе етештергән киндер сәйен алып килеүе күптәргә һоҡланыу уятты