Республика Хөкүмәтенең аҙналыҡ кәңәшмәһендә төбәк Башлығы Радий Хәбиров хәбәр итеүенсә, уның указына ярашлы, Башҡортостан дәүләт ҡурайсылар ансамбле булдырылған.
«Мәҙәниәт буйынса советтан был турала мөрәжәғәттәр күп килде. Республиканың мәҙәниәт министры Әминә Шафиҡова менән ошо йәһәттән ҡеүәтте тикшерҙек. Мәктәптәр ҙә бар, көслө артистар ҙа күп. Шулай булғас, бөгөнгө көндө, 11 мартты, республиканың дәүләт ҡурайсылар ансамблен булдырыу көнө тип иҫәпләргә була», — тине Радий Хәбиров кәңәшмәлә.
Республика Башлығы мәҙәниәт министрына тиҙ арала коллективтың базаһын булдырып, эш башларға ҡушты. Улар Республика көнөндә ансамбль булараҡ сығыш яһарға тейеш.