Дүрт йыл дауамында Пермь ҡалаһында «Башҡорттарҙа ултырыу» клубы уңышлы эшләп килә

2018 йылда дүрт әхирәт ҡул эштәренә булған һөйөүҙәрен башҡорттарҙың сәй эсеү йолаһы менән берләштерергә ҡарар иткән. Бөгөнгө көндә улар - Пермдең күп сараларында көтөп алынған ҡунаҡтар.

«Беҙ төньяҡ-көнсығыш башҡорттарының ҡараңғы фонда сағыу төҫтәр менән тамбур сигеү техникаһын ҡулланабыҙ. Биҙәктәр шулай уҡ төньяҡ-көнсығыш Башҡортостандан килгән. Иң башта беҙ таҫмаларҙан башланыҡ, ә хәҙер ансамблебеҙҙең бөтә кейемдәрен ошо ябай булмаған йөй һәм матур сәскәләр менән тулыһынса сигәбеҙ»,— тип белдерҙе түңәрәк етәксеһе Надя Ғарипова.

Оҫтабикә билдәләүенсә, Пермь крайында Ғәйнә башҡорттарынан тыш, Танып һәм Ҡатай ырыуы вәкилдәре лә йәшәгән. Тап ҡатайҙарҙың зооморф биҙәктәрен ғәйнәләр үҙләштергән дә инде. Ауылдарҙа ҡатай сигеүле алъяпҡыстар осрай. Ошондай ысул менән сигелгән күлдәк Чусова ҡалаһында ла бар икәнлеге билдәле.

Әйткәндәй, оҫтабикәләр Пермь ҡала һабантуйында ҡуйылған “Таҫтамал” бейеүенең һөлгөләре менән илһамланған булған. Мәғлүм булыуынса, бейеү Башҡортостан хореографтары тарафынан ҡуйылған.