Барыһы ла - ата-әсәнең яуаплылығынан

Йәрмәкәй районында уҙғарылған «Ижади майҙан»дың ата-әсәләр майҙансығында республикабыҙҙың һигеҙ районынан ата-әсәләр комитеттары вәкилдәре менән тренинг үтте. Уны психология магистры, Бөтә донъя башҡорттары ҡоролтайы ҡарамағындағы ата-әсәләр комиссияһы рәйесе Эльвира Байназарова уҙғарҙы.

«Ата-әсә булырға мәктәптә өйрәтмәйҙәр. Хәҙерге ваҡытта традицион этник тәрбиә менән бәйләнеш юҡҡа сығырға мөмкин, сөнки күбебеҙҙең эргәһендә оло йәштәге олатай-өләсәйҙәр юҡ, шул уҡ ваҡытта күп осраҡта элекке һымаҡ ике һәм өс туғандар ҙа ныҡлап ҡатнашып, ҙур ғаилә булып йәшәмәй. Борон йолалар тап ошондай мөхит арҡылы тапшырылған. Хәҙер иһә беҙгә «Нисек яҡшы атай-әсәй булырға?», «Балаларҙы тәрбиәләүҙә нимәгә таянырға?» кеүек һорауҙарға яуап эҙләргә тура килә»,  – тип һөйләне Эльвира ханым.

Хәҙерге йәшәү шарттарында, ваҡыт тығыҙ булыу сәбәпле, «Балаға күпме ваҡыт бүләбеҙ?», «Ә күпме бүлергә кәрәк?», «Быуындар араһындағы бәйләнеште нисек һаҡларға?», «Үҙ балаңды аңларға һәм халҡыбыҙҙың мәҙәни мираҫын тапшырырға нисек өйрәнергә?» кеүек һорауҙарға яуап эҙләнде.

«Тәрбиә һүҙ, шәхси үрнәк кенә түгел, ә баланың кисерештәрен аңлау. Бала үҙе лә ата-әсәһенең хистәрен тойорға тейеш. Ҡосаҡлашыу, йылы һүҙ, хуплау, терәк булыу - быларҙың бөтәһе лә башҡорт мәҙәниәтендә бар. Минеңсә, барлыҡ тәрбиә ысулдары комплекслы ҡулланылырға тейеш. Бөгөнгө тренинг үҫеш йүнәлештәрен, мөмкинлектәрен күрһәтте. Артабан барыһы ла ата-әсәләрҙең үҙҙәренән тора», - тип билдәләне тренингты ойоштороусы, ғаилә психологы Эльвира Байназарова.