Ләмәҙ ҡыҙҙары буҙа әҙерләргә өйрәнде

Ләмәҙ ауылы мәҙәниәт йорто төркөмөндә хәбәр ителеүенсә, уларҙа «Айыҡ ауыл-2021» республика конкурсына ярашлы башҡорт халыҡ йолаларын тергеҙеү буйынса күп саралар үтә. Һәр йомала «Ағинәй» берләшмәһе ағзалары ошондай кисәләр, осрашыуҙар ойоштороп тора.

«Бына бөгөн дә ойошма етәксеһе Хөмәйрә Камил ҡыҙы Зинурованың йортонда милли эсемлегебеҙ буҙаны әҙерләү буйынса оҫталыҡ дәресе уҙҙы.

Буҙа бик файҙалы. Ул бөйөр, бауыр, ашҡаҙан сирҙәренән дауалай, нервы системаһы эен яҡшарта, ҡанды таҙарта, организмдағы башҡа күп ауырыуҙарға ҡаршы тора ала. Һоло ононан әҙерләнә, минералдарға, аҡһымға бай. Башҡорттар уны борондан эскән, шуға ла һау-сәләмәт булған.

Оҫталыҡ дәресен йорт хужабикәһе Хөмәйрә Камил ҡыҙы республикабыҙҙа башҡорт йолалары белгесе булараҡ танылған Сәрүәр Суринаның сценарийы буйынса үткәрҙе. Сарала уҡытыусы-ағинәйҙәр Светлана Ишембаева, Раушания Аверьянова (аккомпаниатор), Әлфиә Шәүәлиева, Рәзинә Нуриева һәм 5-7-се класс ҡыҙҙары ҡатнашты», - тиелә төркөмдә.