Түбәнге Кама башҡорттарында — өсөнсө тапҡыр Президент гранты!

Түбәнге Кама ҡалаһының «Урал» башҡорт милли-мәҙәни автономияһы менән Түбәнге Кама химия-технология институтының берлектәге «ЭтноSTYLE — ул беҙҙең стиль!» социаль проекты Рәсәй Президентының 2022 йылда граждандар йәмғиәтен үҫтереүгә бирелгән гранттары конкурсында «Милләт һәм дин-ара теләктәшлекте нығытыу» йүнәлеше буйынса еңеү яуланы.

Проект 1 февралдә старт ала һәм Түбәнге Камала тормошҡа ашырыласаҡ. Уның буйынса этномәҙәни төрлөлөктө һаҡлау, үҫтереү, милләт-ара мөнәсәбәттәрҙе, халыҡтар берҙәмлеген нығытыу маҡсатында ижади, фәнни, күңел асыу, интеллектуаль, белем биреү йүнәлештәрендәге 34 сара үткәреү планлаштырылған. Ҡатнашыусыларҙы ғилми конференция, ижади конкурстар, этно-оҫтаханалар, форумдар һ.б. көтә.

Был ике учреждениеның берҙәм проекттары Рәсәй Президенты грантына конкурста өсөнсө тапҡыр еңеү яуланы. Тәүгеһе — 2020 йылда тормошҡа ашырылған «Дуҫлаш! Хыяллан! Ижад ит!» тип аталғаны — милли мөнәсәбәттәр өлкәһендә иң яҡшы ғәмәли эштәр буйынса IV Бөтә Рәсәй конкурсы финалсылары иҫәбенә инде, «Йыл студенты-2021» республика премияһы финалына үтте.

Проектты тормошҡа ашырыу тәжрибәһе Рәсәй Федерацияһы Йәмәғәт палатаһында үткән «Этномәҙәни секторҙың тотороҡло үҫеше» Дөйөм Рәсәй конференцияһында тәҡдим ителгән, «ЭтНик:ПроДвижение» Бөтә Рәсәй тапшырыуҙарының методик материалдары тупланмаһына индерелгән.

«Дуҫлаш! Хыяллан! Ижад ит!» проектының дауамы булып «Сәләмәт ЭтноSTYLE» тора, ул йәштәрҙе мәҙәниәткә, сәләмәт тормош рәүешенә йәлеп итеү аша милли мәҙәниәтте һаҡлау буйынса әүҙем эшмәкәрлеккә ылыҡтырыуға йүнәлтелгән. Был бурыс ил халыҡтары традицияларына нигеҙләнеп атҡарыла. Проектҡа ярашлы, 2021 йылда Рәсәй һәм республика кимәлендә төрлө яҡлы 26 сара уңышлы тормошҡа ашырыла.