Шағир рухы шатланһын

Бөйөк башҡорт шағиры Рәми Ғариповтың ҡәберенә тыуған яғынан бер ус тупраҡ һалынды. Уны Салауат районы вәкилдәре алып килгән.

Салауат районы хакимиәте башлығы урынбаҫары Марат Ғилманов, Арҡауыл ауылындағы Рәми Ғарипов музейы директоры Луиза Хәйретдинова, М. Ғафури исемендәге Башҡорт академия драма театры актеры, Ш.Бабич исемендәге республика йәштәр премияһы лауреаты Артур Кәбиров, Яҙыусылар союзы рәйесе Зәки Әлибаев һәм Бөтә донъя башҡорттары ҡоролтайы вәкилдәре мосолмандар зыяратында шағирҙың ҡәбере янында булды.

Марат Ғилманов «Рәми рухы» хәтер кисәһе тураһында һөйләне.

«Мәғлүм булыуынса, 2022 йылдың февралендә Рәми Ғариповтың тыуыуына 90 йыл. Беҙ юбилей сараларын көтөп ятмайбыҙ. Рәми Ғариповтың тормош юлына һәм ижадына арналған саралар әле үк башланды. Йәштәр инициативаһы менән «Рәми рухы» хәтер кисәһе үтте. 25 августа Салауат районы Арҡауыл ауылында йәмле Йүрүҙән буйында урынлашҡан «Монай» туристик базаһында йыйылдыҡ. Йәштәр өсөн спорт уйындары, «Беҙ батырҙар төйәгенән!» исеме аҫтында квест-уйын үткәрелде. Шулай уҡ, кисә ауыл биләмәләре араһында эстафетаға старт бирелде. Февралгә тиклем ауылдарҙа хәтер кисәләре үткәреләсәк», - ти Марат Ғилманов.

Салауат районы вәкилдәре Рәми Ғариповтың тыуған йорто нигеҙенән тупраҡ алып килгән. Изге ерҙән изге тупраҡҡа шағир рухы шатланһын, ти салауаттар.

«Бына ошондай хәтер кисәләре ойошторола икән, тимәк, халҡыбыҙҙың рухы һүнмәгән, телебеҙ бар, телебеҙ йәшәй. Шәхес халыҡты күтәрә, шәхестәре менән халыҡ бөйөк була. Халыҡтың күңеленә һалырға кәрәк - шәхестәрен данлағанда ғына халыҡ көслө була. Шәхестәребеҙҙе яҡларға, данларға кәрәк», - тине филология фәндәре докторы, профессор Фирҙәүес Хисаметдинова.