|
Яңылыҡтар
Магнитта рухиәт байрамы18 мартта Магнит ҡалаһының Этник медиа үҙәгендә милли китапхана менән «Аҡ ҡауырһын» әҙәби берекмәһе берҙәм рухиәтте ҙурлауға арналған күркәм байрам уҙғарҙы. Тәүҙә йәмәғәтселек менән киңәйтелгән халыҡ йыйыны ойошторолдо. Киләсәктә берҙәм эшләү, аныҡ бурыстар һәм маҡсаттар билдәләү, туған телде өйрәнеү, әҙәбиәтте һәм мәҙәниәтте үҫтереү тураһында етди һөйләшеү булды. Унда йәмәғәтселәр Рәмил Утарбаев, Руслан Утарбаев, йәштәр лидеры Әнүр Суфьянов, «Аҡ ҡауырһын» әҙәби берекмә ағзалары, «Хазина» фольклор төркөмө, китапхана хеҙмәткәрҙәре һәм уның етәксеһе Резида Ғайсина, китап һөйөүселәр ҡатнашты. Икенсе өлөш байрам төҫөн алды — «Аҡ ҡауырһын» әҙәби берекмә ағзалары Шамил Әхмәтшин менән Йәмилә Хисмәтова үҙҙәренең яңы китаптарын туйланы. Шамил Әхмәтшин өсөнсө шиғри китабын ҡулына алһа, башлап яҙыусы Йәмилә Хисмәтова беренсе китабын яҡташтарына бүләк итте. Ҡәҙриә Исхакова етәкләгән «Сөйөмбикә» фольклор төркөмөнөң сығышы күңелдәргә хуш килде. Асия Ғайсина башҡорт халыҡ йырҙарын башҡарып байрамды биҙәне. |