Учалы башҡорттары ҡоролтайының яңы рәйесе һайланды

Бөгөн Учалы районындағы Бөтә донъя башҡорттары ҡоролтайының бүлексәһе ултырышы үтте. Ҡоролтайҙың Башҡарма комитеты рәйесе Ғәлим Яҡупов һәм Башҡарма комитет ағзаһы Морат Лоҡманов был ултырышта ҡатнашты.

Учалы районы башҡорттары аҙаҡҡы арала башҡарылған эштәрҙең һөҙөмтәһен барланы. Район ҡоролтайы ағзалары алдында йәнә бер бурыс — урындағы йәмәғәт ойошмаһының рәйесен һайлау торҙо. Был вазифа Мозафар Ҡадыровҡа ышаныс менән тапшырылды.

«Мин Барын-Табын ырыуынан, Ҡарт Муйнаҡ ауылынанмын. Учалы районы башҡорттары ҡоролтайының рәйесе итеп һайланыуыма шатмын. Артабан районыма һәм халҡыма файҙа килтерермен, тип ышанам. Күптәнге хыялым — бөтә башҡорт ырыуҙарының вәкилдәрен үҙебеҙҙә, Барын-Табын ерендә йыйынға туплау»,— тип белдерҙе Учалы башҡорттары ҡоролтайының яңы рәйесе.

Мозафар Харис улына уңыштар һәм сәмле хеҙмәт теләйбеҙ!

Бөтә донъя башҡорттары ҡоролтайының Башҡарма комитетының делагацияһы «Европа-Азия. Офоҡтарҙы киңәйтеп» V төбәк-ара фәни-ғәмәли конференцияһында ҡатнашты. Уҡыусыларҙың эҙләнеү эштәрен ҡеүәтләгән ғилми конференцияның бер өлөшө Бөтә донъя башҡорттары ҡоролтайы башланғысы менән уҙғарылған Башҡорт тарихы йылына арналды.