Бер сафта утҡа ҡаршы

Уҙған аҙна аҙағы Башҡортостандың Урал аръяғы райондары өсөн оло һынауға әйләнде. Хәйбулла, Ейәнсура, Йылайыр районында, аҙаҡ Баймаҡ, Әбйәлил һәм Бөрйәндә егерменән ашыу янғын усаҡтары теркәлә. Ғәҙәттән тыш хәлдәр министрлығы иҫәпләүенсә, Башҡортостанда 1.6 мең гектар урман янған.

Хәйбулла районында 6 ҙур янғын теркәлгән: Аҡташ, Йәнтеш, Оло Әбеш, Кесе Арыҫланғол, Ғәлиәхмәт һәм Вәлит ауылдары янында. Хәйбуллала янғындарҙың ауылдарға ҡарай таралыуы ирекмәндәр һәм ҡотҡарыусыларҙың уртаҡ көсө менән туҡтатылған. Ут менән көрәш башҡа райондарҙа дауам итә.

Хәйбулла районы хакимиәте башлығы Рөстәм Шәрипов беренсе көндәрҙән алып ирекмәндәр менән бер сафта янғынҡа ҡаршы көрәште, унан да бигерәк интернет бәйләнешен тотоп, аҙаҡҡы яңылыҡтар менән йәмәғәтслекте таныштырып торҙо. Рөстәм Динислам улы район халҡы исеменән бөтә Башҡортостандан килгән ирекмәндәргә, ул ирекмәндәрҙе үҙендә ҡабул иткән һәм уңайлыҡтар тыуҙырған урындағы халыҡҡа, сығымдарҙы үҙенә алған урындағы эшҡыуарҙарға һәм ут ғәрәсәте менән көрәшкә көсөн һалған кешеләргә рәхмәт һүҙен еткерҙе.