Луганскиҙа Миңлеғәле Шайморатов иҫтәлеге мәңгеләштерелде

12 майҙа Башҡортостан Башлығы Радий Хәбиров Рәсәй Федерацияһы делегацияһы составында Донецк һәм Луганск Халыҡ Республикалары ойошторолоуға ете йыл тулыуға арналған тантаналы сараларҙа ҡатнашты.

Радий Хәбиров Луганск Халыҡ Республикаһының Петровское ҡалаһында ла булды. Тап ошонда 1943 йылдың февралендә легендар башҡорт командирының хәрби юлы фажиғәле өҙөлә.

Радий Хәбиров һәм республика делегацияһы ағзалары башҡорт атлылары һәйкәленә сәскәләр һалды һәм скверҙа ағас ултыртыуҙа ҡатнашты.

Һәйкәл һәм сквер 2009 йылда генерал-майор Миңлеғәле Минһаж улы Шайморатовтың тыуыуына 110 йыл тулыу айҡанлы асылғайны.

Артабан Рәсәй Геройы Миңлеғәле Шайморатов исемен йөрөткән Петровское ҡалаһы мәктәбендә легендар комдивтың бюсын асыу тантанаһы үтте.

«Беҙҙең ата-бабаларыбыҙҙың яҡты иҫтәлеген ҡәҙерләп һаҡлағанығыҙ өсөн барығыҙға ла сикһеҙ рәхмәт һүҙҙәрен әйткем килә. Бында генерал Шайморатовтың, Башҡорт кавалерия дивизияһы яугирҙарының һөйәктәре ята. Уларҙың хәтерен хөрмәтләгенегеҙҙе күреп торам. Шуға күрә һеҙҙе туғандар тип атайбыҙ. Туғандаш Башҡортостан Республикаһы халҡынан ҙур рәхмәт һеҙгә», — тине Радий Хәбиров.

Был яҙманы фәһемле тип тапһағыҙ, беҙҙең telegram-каналға яҙылырға саҡырабыҙ: t.me/kurultaibashkir